SELAMAT PASKAH JESUS SUDAH BANGKIT

JAMITA DI PARNINGOTAN DI HAHEHEON NI TUHAN JESUS KRISTUS

Barita Nauli na sinurathon ni si JOHANNES Bindu 20
mamungka sian ayat 1 sahat ro di ayat 18 songon on ma didok "----------------------------------------------------------------------------".

Andorang so hupungka manjaha jamita/renungan on, parjolo ma ahu dohot sude keluargaku pasahathon tu hamu: SELAMAT PASKAH “JESUS SUDAH BANGKIT”
Na di ari Jumat tanggal 25 Maret 2005 nadidok “Jumat Agung” marpungu do sude Halak Kristen di Garejana be patupahon ulaon di Parningotan ni Hamamate ni Tuhanta Jesus Kristus

Hamatean” ima sada fakta na so boi tulahon ni sude namangolu jala songon nanidok ni endentai: nasa jolma ingkon mate. Ndang adong nanggo sahalak pe naboi mangalo hamateani, namora, napogos, nasangap, nalea ndang adong sada hapistaran pen a boi manahan haroro ni hamatean i, sude do ingkon mamolus hmatean i. Molo songgop hamatean tu bagasan sadasada keluarga, sude do tarilu-ilu, tumatangis, marsak, dohot angka tondong nahumaliang pe sude dohot marhabot ni roha.

Tung habiaran situtu do hamatean i. Ala ni biar ni halak Batak tu hamatean i, tarida do i dipandohan molo laho manaringoti na mate halak Batak ditonga ni jabu sai parjolo do didok
“Santabi di Jabu on”, Songoni ma hebat ni hamatean i, sude do manghabiari, “boasa ? ala ndang adong naumbotosa tudia molo dung mate.

Di Ari Parningotan ni hamamate ni Tuhanta Jesus Kristus, tangkas do tabege di partangiangan passion, ngalut ni partinaonan ni Jesus laho mangadopi hamatean i, dipasiaksiak, dilinsingi, sahat tu na dipajalhon Ibana di Hau Pinarsilang i, ingkon adopan ni Jesus hamatean i ndang ala ni dosaNa, manang ala ni hajahatonna, alai dijalo Ibana do i “ala ni holong ni rohaNa di hita jolma pardosa on, ingkon mate Ibana humonghop hita, jala gabe dosa Ibana na so mardosa hian.

Di namarningot hita sadarion di ari haheheon ni Tuhanta Jesus Kristus, parjolo sahali naeng idaonta disi ima:

01. BUKTI (1) : Haheheon = Kebangkitan
Sugari ndang hehe Jesus sian namate, aha ma gunana hita martangiang, ala Jesus namate i ndang mungkin mambege tangiangta.
Sugari ndang hehe Kristus sian namate, ndang marguna be manjaha angka barita nadisurathon di Bibelta i.

02. BUKTI (2) pajumpang dohot Jesus naung hehe i, Songoni pe lelengna angka sisean ni Tuhan I rap dohot Tuhan Jesus, laos so adong do sian nasida namarningot pandohan ni Jesus “ Hehe do Ibana di ari patoluhon” (Markus 9 ayat 31-32).

Malahan, angka alo ni Jesus do namarningot, ima angka Parise dohot Siboto Surat. Laho pe Boru-Boru na ias roha I tu Tanoman ni Jesus di manogotna dung tolu ari, ndang ala nadiingot nasida pandohan ni Jesus namandok “Hehe Ibana di ari patoluhon” ndaong – alai ala ni adat hasomalan do di nasida ima molo adong na mate, di ari patoluhon dung mate sai laho do nasida tu tanoman ni na mate i.

Ala ni holong ni roha nasida do di Jesus naung mate i umbahen nalaho nasida tu tanoman i ndang ala ni ajaran dohot tona ni Jesus tu nasida saleleleng rap dope nasida Songoni do parlao ni angka boru-boru tu tanoman ni Jesus jala nasida ma parjolo umbotosa naung hehe Jesus sian na mate
Molo di hita halak Batak didok ma marsuap manang manuan ompu-ompu.

Songoni do nang hita halak Batak Kristen: Molo ditingki Ulaon na Hohom di ari parningotan ni hamamate ni Tuhan Jesus, dung didok Pandita sian jolo an, dungi tos ma hosaNa” torop do boru-boru tangis, sosombopon tarlobi molo dipalu giting-giting tolu hali.

Ra, Ra do da hudok, ndang tangis hita marningot partinaonan ni Tuhantai laho humonghop dosantai, ate angka Inang, alai natarsingot do rohanta di angka natahaholongi naung jumolo monding ate??

03. BUKTI (3) Ngolu Naimbaru
Didok Tuhan Jesus tu si Maria “Unang Ahu Jama” ai ndang dope nangkok Ahu tu Ama i. Nalaho nangkok ma Ahu tu Damang jala Amamuna, tu Debatanghu jala Debatamuna. (ayat 17), Dipatuduhon Jesus do disi, Ngolu Naimbaru, tugas dohot kewajiban, huhut patuduhon makna dingolu naimbaru tu angka naporseai, jala haheheon i gabe jombatan hadomuan ni jolma pardosai gabe boi marsaor dohot Debata dibagasan holong ni roha ni Debata.

Haheheoni patuduhon huaso ni Debata namamonggolhon huaso ni sibolis na sai manegai parsaoranta dohot Debata. Asa tangkas sahat nang tu hita hapapatar ni Haheheon ni Tuhanta Jesus, taargahon ma ngoluntai, unang tapansuasaehon tapadao ma pargadombuson, halosohon, parhosomon dohot parbadaan, dohot lan na asing angka pangalaho na so nihalomohon ni Debata.

Hita naung manjalo ngolu naimbaru marhite hamamate ni Jesus humonghop hita, jala naung hehe sian namate laho mangondihon hita, ingkon do arga bahenonta ngoluntai.

Ra, jot6jotan do hita na so manghilala porlu ni ngolui di hita, “boasa” ala so dung dope hita mate. Antong porlu do jolo hita mate asa taargai ngoluntai?? Ah, songon namambuat cuti ate.
Antong, anggo songoni, porlu situtu do hita merobah sikap maradophon ngolui. Molo di nasaleleng on, tapanghilalahon ngolui songon na otomatis, manang ro dohot sandirina, lapatanna salpu sadarion, marsogot ro muse ngolui. Ise sian hita na boi manjamin bahwa marsogot mangolu dope hita.

Tangkas jala tahaporseai do ia adong ngolunta on, ngolu nasian Debata do. Ganup sogot dilehon Debata ngolui di hita. Molo songoni do haporseaonta, na sian Debata do ngolu i tama do hita mandok mauliate tu Debata, jala manghilalahon betapa berharganya ngolu i. Ganup sogot, tingki karejo, mulaanta ma dibagasan las ni roha huhut mandok “Mauliate ma Tuhan”, dilehon Ho dope di ahu sada ari dohot ngolu naimbaru.

Disada tingki di ari haheheon ni Tuhan Jesus, hudohoti do sada kebaktian subuh di tanoman, mansai holom dope, hundul ma ahu di sada batu nisan, jala dina samarsamar hujaha ma goar ni na mate di tanoman nahuhunduli i, tompu ma ahu sadar ndang mate dope ahu

Panghorhon ni haporseaonta: Mate Tuhanta Jesus, jala hehe sian namate, laho padomuhon hita jolma na mardosa hian dohot Debata asa dapot hita hangoluan sogot di inganan naung pinarade ni Tuhanta di angka naporseai.

Antong dohononta ma:
Jo hamatean, sude do halak mabiar marnida ho, molo mandok goarmu pe hamatean dibagasan jabu ingkon jolo marsantabi, molo songgop ho ditongatonga ni sada keluarga, sude do tumatangis, molo pinapungu ilu-ilu ni halak Batak ala ni ho nunga gumodang sian aek na di tao toba an.

Alai, anggo nuaeng ndang huhabiari be ho, ai porsea do ahu, naung hehe Tuhanku sian namate jala naung manobus sude dosanghu, namangondihon ahu molo tung ro pe ho tu ahu, ai nunga rade hasonangan di ahu napinarade ni Tuhanku.

Paskah, patubegehon barita: silehon-lehon ni Debata do ngolu on, antong taargahon ma, ndang holan mangargahon dohot do disi tugas ima pangoluhon ngolui marhite pangalaho namasihaholongan hita sama hita, songon panghaholongion ni Debata di ganup hita.

Amen