JOHANNES 20:1-18

JAMITA DI PARNINGOTAN
DI HAHEHEON NI TUHAN JESUS KRISTUS
Minggu : 08 April 2007

Barita Nauli na sinurathon ni si JOHANNES Bindu 20
mamungka sian ayat 1 sahat ro di ayat 18 songon on ma didok
----------------------------------------------------------------------------
Andorang so hupungka manjaha jamita/renungan on, parjolo ma ahu dohot sude keluargaku pasahathon tu hamu:

SELAMAT PASKAH “JESUS SUDAH BANGKIT”
(alusna : Ya benar Jesus sudah bangkit)

Na di ari Jum’at 06 April 2007:
nadidok “Jumat Agung” marpungu do sude Halak Kristen di Garejana be patupahon ulaon di Parningotan ni Hamamate ni Tuhanta Jesus Kristus

Ia Hamatean” i ma sada fakta na so boi tulahon ni sude namangolu jala songon nanidok ni endenta i:
nasa jolma ingkon mate.
(kecuali songon nadibaritahon di Padan na robi si Henok dohot si Elia)
Ndang adong nanggo sahalak pe na boi mangalo hamatean i, namora, napogos, nasangap, nalea jala ndang adong sada hapistaran pe na boi manahan haroro ni hamatean i, sude do jolma ingkon mamolus hamatean i.
Molo songgop hamatean tu bagasan sada sada keluarga, sude do tarilu-ilu, tumatangis, nang angka tondong nahumaliang pe dohot do marhabot ni roha.

Ditonga-tonga ni parsaoran ni Halak Batak, tung sada sihabiaran situtu do hamatean i. Ala ni biar ni halak Batak tu hamatean i, dapot tarida do i dipandohan ni halak Batak:
1. Molo laho manaringoti na mate ditonga ni jabu sai parjolo do didok
“Santabi di Jabu on”
Songoni ma kehebatan ni hamatean i, sude do manghabiari,
“boasa tahabiari hamatean i?
Alus apala na positip i ma: ala ndang adong naumbotosa, tudia do jolma i molo dung mate. Sugari adong sian na mate I mulak lao paboahon tu tondongna mandok: tabo do hilalaon molo dung mate, ndang pola loja mancari, ma rade sude, holan na marpesta, godang tondong dohot lan naasing angka hasonangan, ra ndang mabiar be jolma mate, malahan mungkin naeng hurang tibu ibana mate.

Di Ari Parningotan ni hamamate ni Tuhanta Jesus Kristus, tangkas do tabege di partangiangan passion, ngalut ni partinaonan ni Jesus laho mangadopi hamatean i, dipasiaksiak, dilinsingi, sahat tu na dipajalhon Ibana di Hau Pinarsilang i. ingkon adopan ni Jesus hamatean i ndang ala ni dosaNa, manang ala ni hajahatonna, alai dijalo Ibana do i “ala ni holong ni rohaNa di hita jolma pardosa on”, ingkon mate Ibana humonghop hita, jala gabe dosa Ibana na so mardosa hian.
Sude do halak Kristen mamboto kejadian i marhite jamita nabinegena di Gareja dohot di angka partangiangan, dohot marhite najinahana di angka na tarsurat di bagasan Bibelta i. Jala taihuthon do Ulaon na Badia dohot tujuan dibagasan rohanta be asa parsidohot hita malua sian dosa siala panghokhopon ni Jesus di hita jolma pardosa on.
Jala marhite panghokhopon ni Tuhanta i, ingkon mate Ibana asa mangolu hita, ro ma sungkun-sungkun tu dirinta nuaeng: dung do taresapi panghokhopon ni Jesus i dibagasan dirinta be, gabe olo hita pauba rohanta mangoloi pangidoan ni panghokhopon i songon naung taoloi di padanta tu jolo ni Tuhanta I andorang so tajalo ulaon na badia i?

Bagian Paduahon :

Di namarningot hita sadarion di ari haheheon ni Tuhanta Jesus Kristus, parjolo sahali naeng idaonta disi i ma:

01. BUKTI naparjolo : Haheheon = Kebangkitan
A. Sugari ndang hehe Jesus sian namate, aha ma gunana hita martangiang, ala Jesus na mate i ndang mungkin ibana mambege tangiangta.
B. Sugari ndang hehe Kristus sian namate, ndang marguna be manjaha angka barita na tarsurat di Bibelta i.
C. Sugari ndang hehe Jesus sian na mate,magopo ma haporseaonta i.

BUKTI paduahon : Hagaleon ni haporseaon ni jolma i.

Songoni pe lelengna angka sisean ni Tuhan i rap dohot Tuhan Jesus, laos so adong do sian nasida namarningot pandohan ni Jesus “ Sipasahaton ma Anak ni jolma i tu tangan ni halak, jala pusaonna ma Ibana; alai dung dipamate, Hehe do Ibana di ari patoluhon” (Markus 9 ayat 31)

Malahan, angka alo ni Jesus do namarningot, pandohan i i ma angka Parise dohot Siboto Surat.

Laho pe Boru-Boru na ias roha i tu Tanoman ni Jesus di manogotna dung tolu ari, ndang ala na di ingot nasida pandohan ni Jesus namandok “Hehe Ibana di ari patoluhon” ndaong – alai ala ni adat hasomalan do di nasida i ma molo adong na mate, di ari patoluhon dung mate sai laho do nasida tu tanoman ni na mate i.
Adat hasomalan di Halak Batak, i ma, dung 3 ari dung di tanom na mate i, lao ma sisolhotna tu tanoman, didok ma di hasomalan ni Halak Batak manuan ompu-ompu.

pajumpang dohot Jesus naung hehe i
Songoni do parlao ni angka boru-boru tu tanoman ni Jesus, Ala ni holong ni roha nasida do di Jesus naung mate i umbahen na laho nasida tu tanoman i. Ndada ala ni pandohan ni Jesus na mandok: na hehe Ibana di ari patoluhon, jala bukti ni i: na so di ingot nasida pandohan ni Jesus ai tarsonggot do nasida ala di ida nasida nunga mungkap batu tutup ni tanoman i, jala ndang di ida nasida disi bangke ni Jesus.
Pingkiran nasida mandok: ise ma nabarani manangko bangke ni Jesus
nahinaholongan nasida i.
Jala dung ruar nasida sian tanoman i, di ida nasida ma sahalak baoa jongjong di si, jala mabiar ma nasida ai dirimpu nasida begu, alai didok baoa I ma tu nasida: ise naniluluanmu, ndang dison Ibana (Lukas 24. 6) mulak ma nasida jala nasida ma parjolo umbotosa naung hehe Jesus sian na mate, jala hapogan ma nasida mulak sian tanoman i.

02. BUKTI (3) Ngolu Naimbaru
Didok Tuhan Jesus tu si Maria “Unang Ahu Jama” ai ndang dope nangkok Ahu tu Ama i. Nalaho nangkok ma Ahu tu Damang jala Amamuna, tu Debatanghu jala Debatamuna. (ayat 17)

Dipatuduhon Jesus do disi, Ngolu Naimbaru, tugas dohot kewajiban, asa sahat do nang hapapatar ni haheheon ni Tuhanta Jesus tu hita na pungu on.

Asa marhite haheheon ni Tuhan Jesus sian na mate, asa arga tabahen ngolunta i, unang tapansuasaehon tu pargadombuson, hamalason, ta padao ma parhosomon, late, roha rimas, ginjang ni roha, dohot lan angka parrohaon na so nihalomohon ni Debata di hita naung manjalo ngolu naimbaru, dung mate Jesus humonghop hita ala ni dosanta jala hehe sian na mate lao mangondihon hita di ngolu naimbaru, asa tapangke ma nian ngolunta on tu angka namarguna di hita dohot di nahumaliang hita.

Taingot ma songon na nidok ni Jesus natarsurat di Mateus 16 ayat 26 na mandok: Aha ma gunana di jolma i.
Nang pe diomo sandok tano on, anggo mate do tondina,
ai boi jolma i pangolu tondi na mate.


St. D.P.Hutagalung/Br. Simarangkir

Songoni do nang hita halak Batak Kristen: Molo ditingki Ulaon na Hohom di ari parningotan ni hamamate ni Tuhan Jesus, dung didok Pandita sian jolo an, dungi tos ma hosaNa” dipalu giting-giting. Hohom ma sude jala torop do boru-boru tangis, ansosombopon marningot nahinaholonganna naung jumolo monding, jala ndang tatangisi dirinta jolma pardosa on, nang pe taboto do: hansit ni partinaonan ni Tuhantai, jala ingkon mate Ibana tarpajal di Hau Pinarsilang i laho humonghop dosantai, alai natarsingot do rohanta di angka natahaholongi naung jumolo monding i.